Cámara de Comercio del Ferrol

Rebaixas

Enténdese por vendas en rebaixas as realizadas por comerciantes en determinadas épocas do ano, xeralmente vinculadas a períodos estacionais e fin de temporada, cando os artigos obxecto destas se oferten, no mesmo establecemento no que se exerce habitualmente a actividade comercial, a un prezo inferior ao fixado antes das devanditas vendas como consecuencia do remate dunha tempada comercial.

Os produtos obxecto da venda en rebaixas non poderán ter sido obxecto de ningunha actividade promocional de vendas no transcurso do mes que preceda á data de inicio da venda en rebaixas. De feito, os comerciantes deberán comunicar, cun mes de antelación, á consellería competente en materia de comercio, as actividades de promoción de vendas que pretendan levar a cabo no mes que preceda á data de inicio da venda en rebaixas.

Cando a venda en rebaixas non comprenda polo menos a metade dos artigos existentes non se poderá anunciar con carácter xeral, senón referida exclusivamente aos artigos ou sectores aos que realmente afecta. Cando se ofertan artigos a prezo normal e a prezo reducido, uns e outros deberán estar o suficientemente separados para non inducir error. Isto tamén sucede nas outras modalidades especiais de venda (saldos, liquidación, promoción)

Tempadas de rebaixas

As vendas en rebaixas só poden ter lugar en dúas temporadas anuais: unha ao principio do ano, e a outra en torno ao período estival de vacacións.

• En Galicia, as rebaixas de inverno se desenvolven entre o 7 de xaneiro e  o 7 de abril, e as rebaixas de verán entre o 1 de xullo e o 30 de setembro.
• Dentro destas datas, cada comerciante fixa a duración que considere máis conveniente, sempre que sexa como mínimo dunha semana e como máximo de dous meses.

Calidade dos produtos rebaixados

Non se poden ofertar como rebaixados:

• Os artigos deteriorados ou adquiridos expresamente coa finalidade de seren vendidos a un prezo inferior ao ordinario.
• Aqueles produtos que non estiveran á venda con anterioridade.
• Os artigos que fosen obxecto de calquera outra práctica de promoción no curso do mes que precede á data de inicio das rebaixas.

Información para os consumidores

• Publicidade : Débese exhibir nun lugar visible, aínda que o comercio estea pechado, un cartel no que figuren as datas de inicio e fin das rebaixas.
• Indicación de prezos: As etiquetas de cada produto deberán mostrar con claridade o prezo anterior xunto co novo prezo. Non obstante, cando se trate dunha redución porcentual nun conxunto de artigos bastará con anunciar o desconto xeral, sen necesidade de que conste individualmente en cada artigo.

Condicións

A persoa comerciante estará obrigada a admitir os mesmos medios de pagamento que acepta habitualmente.

Non se poderá simultanear, no mesmo establecemento comercial e para o mesmo tipo de produtos, a venda en rebaixas con calquera outra actividade promocional de vendas.